الليلادي
الليلادي يا جميلة
قلبى حاسس بالهدوء
قلبي مفعم بالايمان
قلبي مليان بالحنان
قلب يطرح من جنابه
الوان وشوق
قلب طيب مستكين
نفسه يخشع من سنين
ويقيم صلاته
ويشوف في ذاته
ذات الشعاع
اللي صادر
من شموس التعبانيين
اللي حير...قلب كل الحيرانيين
الليلادي يا جميلة قلبي هادي
قلب راضى
قلب عادي
قلب عايز من سكات
يصرخ ينادي
الليلادي....نفسي انام
وسط السكون
تحت قبة من قبابك
او ارتمي ابكي ببابك
يمكن انول لحظة خلاص
تطرح سلام
الليلادي يا جميلة
لا كلام
الليلادي مش هنزرع
الا ترنيمة خشوع
مش هنبدر الا ذرات الدموع
تجري تطهر قلب مليان بالذنوب
قلب مشتاق يا جميلة
الليلادي الليلادي الليلادي يتوب
ااااااه
الوجع في القلب اصبح لا يطاق
انزعى من قلبي موته والنفاق
هدهدي قلبي بايدك واحضنيه
وامسحي من فوق جبينه
كل اشواكه وصونيه
يا جميلة الليلادي
مش هينفع قلبي يبذل غير بكاه
بين ايديكي
مش هيقدر يمنحك
الليلادي يا جميلة غير صفاه
بيكي وليكي
لوتقبليه
او تمنعيه
مش هيرفع تاني راسه إلا لما ترضي عنه وتراضيه
وف حماكي تسمحيله بالطواف
ينسى لحظة انه لازم من جلالك كل اطرافه تخاف
يرمي سدره فوق جدارك
يرمي حمله جوه دارك
يبكي بحرقة وبخشوع
يهدي قربانه بخضوع
يسعى يهرول بين حنانك وامتنانك
ان رضيتي يبقى فاز بالحسنيين
وان غضبتي
يبقى ويل المحرومين
يبقى ويل القانطين
الليلادي يا جميلة بابتهل
انك تفيضى برحمتك
تشمل جميع المؤمنين
