علشان نعيش
علشان نعيش
لازم نموت
وان حاولت ف مرة من نفسك تفوت
تلقى آخر السكة يافطة مرعبة
لازم تموت
* * * * * * * * *
والموات اليومي يبدأ
من صريخ الطفل لما تحضنه
أمه بحنان
بالله عليكو
السؤال اللي تسالناه من زمان
ليه بيبكي؟
حد يا اخوانا يجاوب
غير جوابي
اللي مكتوب في الضمير
علشان نعيش
لازم نموت
يا ترى الطفل شافك يا نذير
ولا حس بخنقته لما اتزنق
بعد الرحم جوة البيوت
علشان نعيش
لازم نموت
* * * * * * * * *
نكبر وتكبر بينا أحلام الصغار
ونشوف بعينا نفسنا اكبر كبار
نغرس صوابعنا في خيوط الشمس
نغزل نهار
وان حد هدك غزلنا ننشب ايدينا جوه زوره
ناخد قرار
نرفع في وشك يا فشل
عايزين نعيش
أغزل وأغزل
ويهدوا غزلي وانتفض من تاني أغزل
مش هتقدر يا فشل
تلمس نسيجي
واجري أفتش بين جنابك يا مدينة عن ملاذ
واجمع من الورد اللي فيكي
شلة صحاب
رايقة ولذاذ
ادفى وادفيهم بثوبي
اللي نسجته من خيوط الشمس
نلمس بأطرافنا طرافه لمس
بلكي لما يوم أغيب
أو أنام
حد فيهم يفتكر يرمي السلام
* * * * * * * * *
وف وسط مشواري أشوفك يا نسيج
ألقاك معلق ع البيوت
او مغطي
معرفش ليه قبر وتابوت
والقاني غازل
وبايديا
"علشان نعيش
لازم نموت"
سيبنى في حالي يا طاغوت
هو أنت إيه
يا رحمة فينك الحقينا ارحمينا
حسي بينا أو خدينا
الخيار دايما يحطه بين ايدينا
واختار يا حر
لو مرة تنفع او تضر
اختار يا حر
بين المحال والمستحيل
وان مرة تقدر من خيوط الشمس تغزل ليل في ليل
تلقى الخيار
او عليك بالانتظار
يمكن تنول العفو وتقول القرار
يمكن تموت علشان تعيش
يا رحمة فينك خديني واشمليني
ولا يمكن ارتمي بين اديكي اركن جبيني
وارتاح شوية م الطاغوت
ولا لازم كل كلمة "اعيش" يتبعها "موت"
يا رحمة جاوبي باسالك
ممكن اعيش
لا......لا
ممكن تموت
ليست هناك تعليقات:
إرسال تعليق